||  ಹರಿ ಸರ್ವೋತಮ - ವಾಯು ಜೀವೋತ್ತಮ  ||   

!! శ్రీ గురుబ్యోన్నమః హరిః ఓం !!

!!శ్రీ మూలరామ, దిగ్విజయరామ,వేదవ్యాసః విజయతే !!

!! శ్రీ సత్యనారాయణ దేవస్థానము-ఉత్తరాది మఠము !!

E-3, ఇండస్ట్రియల్ ఏరియా, పాలమూరు (మహబూబ్ నగర్)

ఉత్తరాది మఠము- పాలమూరు చరిత్ర : (2001 తో 2017)

పాలమూరు (మహబూబ్ నగర్) లో శ్రీమదుత్తరాది మఠం ఆవిర్భావం వెనక ఘనమైన చరిత్ర దాగి వుంది. ప్రాతః స్మరణీయులైన శ్రీ శ్రీ శ్రీ ೧೦೦೮ శ్రీ సత్య ప్రమోదతీర్థుల వారు తమ సంచారములో భాగంగా పాలమూరుకు వచ్చినప్పుడల్లా ఆశ్రయం కల్పిస్తూ సంస్థాన మహాపూజకు ఏర్పాటు చేసినవారిలో అగ్రగణ్యులు  కీ. శే. గుత్ప ప్రహళ్లాద రావు రాజమూర్కర్.

 

స్వామీజీ వచ్చినప్పుడల్లా పాలమూరు జిల్లాకేంద్రంలో ఉత్తరాదిమఠం ఏర్పాటు  చేయాలని, అందుకు స్థలాన్ని సమకూర్చి, మఠం నిర్వాహణకు సహకరిస్తామని పరి పరి విధములుగ ప్రాధేయపడిన శ్రీమఠపు ప్రియశిష్షులలో కీ. శే. గుత్ప ప్రహళ్లాద రావు రాజమూర్కర్ ప్రథములు.

 

మహబూబ్ నగర్ రైల్వే స్టేషన్ ప్రాంతంలో కల మోతీనగర్ లో తమ నివాసం ప్రక్కన 100 గజాల స్థలాన్ని మఠం ఏర్పాటుకు ఉచితంగా ఇవ్వడానికి ముందుకు రాగా శ్రీ శ్రీ శ్రీ సత్యప్రమోద తీర్థుల వారు అట్టి స్థలాన్ని దానంగా స్వీకరించి మఠం ఏర్పాటుకు సమ్మతిని తెలిపిరి. తదనంతరం కొంతమంది భక్తుల అభీష్టం మేరకుగాను, శ్రీ శ్రీ ೧೦೦೮ శ్రీ సత్యాత్మ తీర్థ శ్రీపాదుల సూచన ప్రకారంగాను, అప్పటి పరిస్థితుల కనుగుణంగా పెద్దలందరూ సమీక్షించి శ్రీమఠాన్ని పట్టణ నడిబొడ్డులోవున్న ఇండస్ట్రియల్ ప్రాంతంలో యేర్పాటు చేయాలని నిర్ణయించిరి.

 

ఉత్తరాదిమఠం యేర్పాటు ప్రయత్నంలో భాగంగా తేది 06-02-2001 నాడు జిల్లాలోని కొంతమంది శ్రీమఠపు శిష్యులు మరియు శ్రీ రాఘవేంద్ర సేవా సమితి సభ్యులు అందరూ కలిసి శ్రీ ఆద్య కేశవాచార్యుల (చింతరేవుల) వారి అధ్యక్షతన ఒక సమావేశం నిర్వహించి, స్థానికంగా ఇండస్ట్రియల్ ప్రాంతంలో కల అప్పటి ఆదర్శ పేపర్ మిల్స్ ఆవరణలో సుమారు 1200 గజముల స్థలాన్ని, షెడ్డు భవనముతో సహా మిల్లు యజమాని శ్రీ ధరూరు శేషగిరి రావు (శ్రీ మొదలకల్లు శేషదాసుల వంశస్థులు) వద్దనుండి ఖరీదు చేసి శ్రీమదుత్తరాది మఠం యేర్పాటు చేయాలని తీర్మానించారు. అందులోనే ఒక గర్భాలయం నిర్మించి శ్రీ రమా సహిత శ్రీ సత్యనారాయణ స్వామి, శ్రీ ఆంజనేయ స్వామి విగ్రహాలతో బాటు శ్రీ శ్రీ జయతీర్థుల, శ్రీ శ్రీ సత్యప్రమోదతీర్థుల మృత్తికా బృందావనము ప్రతిష్టించాలని తీర్మానించి సంకల్పించగా ఇందుకు శ్రీ శ్రీ శ్రీ ೧೦೦೮ శ్రీ సత్యాత్మతీర్థుల వారు ఆశీర్వదించి అనుగ్రహించారు. మహాస్వాములవారి మంత్రాక్షతల బలంచేత కార్యనిర్వహణ దీక్ష శక్తిని పుంజుకుంది. మహాస్వాములు తమ అనుగ్రహంతో పాటు ప్రముఖ విద్వాంసులు సుధాపండితులు అగు శ్రీ ఆనందాచార్ జ్యోషి వారిని స్థానిక ఉత్తరాదిమఠం వ్యవస్థాపకులుగా నియమించి పాఠ ప్రవచనములతో మద్వసిద్ధాంత ప్రచారము చేయుచు శ్రీమఠం అభివృద్ధికి కృషిచేయవలసిందిగా అనుగ్రహించారు.

 

తదనంతరము మఠం ఏర్పాటు విగ్రహ ప్రతిష్టాపన వంటి కార్యక్రమాలకు ఒక కార్యనిర్వాహక వర్గము యేర్పడింది. శ్రీ రాఘవేంద్ర సేవా సమితి పాలమూరు సభ్యుల సహకారంతో, అనేక మంది గృహస్థుల, భక్తుల ప్రోద్బలంతో శ్రీ ఆద్యకేశవాచార్యుల నేతృత్వంలో విద్వాన్ శ్రీ ఆనందాచార్ జ్యోషి వారి పర్యవేక్షణలో శాలివాహన శక 1924 శ్రీ చిత్ర భాను నామ సంII మార్గశిర బహుళ తదియ - ఆదివారం తేదీ 22-12-2002 న ఉదయంII గం.45. నిII లకు పుష్యమి నక్షత్ర యుక్త కుంభలగ్నమున శ్రీమత్ పరమహంస పరివ్రాజకాచార్య ఇత్యాది బిరుదాలంకృతులైన, శ్రీమాన్ మద్వాచార్య మూల మహా సంస్థానం శ్రీమద్దుత్తరాధిమఠాధి పతులైన శ్రీ శ్రీ శ్రీ ೧೦೦೮ శ్రీ సత్యాత్మ తీర్థుల కరకమలములచే విగ్రహప్రతిష్టాపన కార్యక్రమము వేలకొలది భక్తుల సమక్షంలో వైభవంగా జరిగింది.

 

శ్రీమద్దుత్తరాధిమఠం యేర్పాటైన నాటి నుంచి నేటి వరకు ప్రతి పౌర్ణిమ శ్రీ సత్యనారాయణ వ్రతములు, శ్రీ మజ్జయతీర్థుల ఆరాధనా ఉత్సవము శ్రీ సత్యప్రమోదుల ఆరాధనా ఉత్సవములతో పాటు అనేక యతివరేణ్యుల ఆరాధనా ఉత్సవములు శ్రీమఠంలో జరుగుతూ ఉన్నాయి.

 

శ్రీ రాఘవేంద్ర సేవా సమితి మరియు విశ్వ మధ్వ మహా పరిషత్ సభ్యుల సహకారంతో అనేక ధార్మిక, ఆధ్యాత్మిక, సామాజిక సేవా కార్యములను శ్రీమఠంలో నిర్వహిస్తున్నారు.

 

పాలమూరులో మహాస్వాముల చాతుర్మాస్య దీక్ష -2017

శ్రీ శ్రీ శ్రీ ೧೦೦೮ శ్రీ సత్యాత్మ తీర్థ శ్రీపాదుల (ಶ್ರೀ ಶ್ರೀ ಶ್ರೀ ೧೦೦೮ ಶ್ರೀ ಸತ್ಯಾತ್ಮ ತೀರ್ಥ ಶ್ರೀಪಾದಂಗಳವರು)వారు తమ 22వ చాతుర్మాస దీక్షను తేదీ : 18-07-2017 నుండి 06-09-2017 వరకు పామూరు పట్టణంలో ఆచరించడం తమ పూర్వజన్మ పుణ్య సుకృతముగా భావించి జిల్లాలోని భక్తులు, శ్రీమఠపు శిష్యులందరు అత్యంత భక్తి శ్రద్ధలతో ఏర్పాట్లు చేశారు.

 

"మహాస్వాముల దర్శన భాగ్యం కోసం, స్వామి వారికి పాదపూజలు సలిపి, పాదపద్మములను స్పర్శించుకొని పునీతులవ్వాలని ఉవ్విళ్లూరుతున్నారు. వేయికళ్లతో ఎదురుచూస్తున్నారు.

 

!! మద్వేషార్పణమస్తు !!

Chaturmasya 2017 Committee

Copyrights © chaturmasya2017mahabubnagar.com, All rights reserved                                    Designed & Maintained by Arrow Media Services